پەیامی كومیتەی ناوەندی سازمانی خەبات ی كوردستانی ئێران بەبۆنەی ٤٥هەمین ساڵڕۆژی دامەزراندنی سازمانی خەبات
كۆمەڵانی كۆڵنەدەر و خۆڕاگری كوردستان!
ئەندامان و پێشمەرگەو لایەنگرە تێكۆشەرەكانی سازمانی خەبات!
كەس و كاری سەربەرزی شەهیدان و زیندانیانی سیاسی!
دۆستانی نەتەوەی كورد و سازمانی خەبات!
٥ی خەرمانانی ١٤٠٤ی هەتاوی بەرانبەر بە ٢٧ی ئەگوستی ٢٠٢٥ی زاینی، ٤٥ ساڵ بەسەر دامەزراندنی سازمانی خەباتی كوردستانی ئێراندا تێدەپەڕێ. یادی شكۆداری ٤٥ ساڵ خەبات و تێكۆشانی بەردەوامی سازمانی خەبات، لە سەرجەم تێكۆشەرانی ڕێگەی ئازادی و هۆگرانی ڕێبازی سازمانی خەبات پیرۆز بێت. لە ساڵڕۆژی دامەزرانی سازمانی خەبات، درود و سڵاو دەنێرین بۆ گیانی پاكی ڕێبەری كوردایەتی و دامەزرێنەری سازمانی خەبات، مامۆستا سەیید جەلال حوسینی و شەهیدانی سورخەڵاتی سازمانە تێكۆشەرەكەمان.
بڕیاردان لە پێكهێنانی قەوارەیەكی نەتەوەیی و نیشتمانی لە ڕێكەوتی ٥ی خەرمانانی ١٣٥٩ لە هەلومەرجێكی هەستیار و دژوارداو بۆ بەرەنگاربوونەوەو ڕاوەستان لەبەرانبەر هێزی دژمنی قین لەدڵ و جینایەتكاری ئاخوندی، سەرەتای قۆناغێكی نوێی بەربەرەكانی لە خەباتی نەتەوەیی و نیشتمانی بۆ وەدەستهێنانی مافە ڕەواكانی گەكە‌مان لە كوردستانی ئێران بوو. دامەزرانی سازمانی خەبات پێویستییەكی مێژوویی و سەردەمیانە بوو بۆ پێشەنگایەتی شۆڕش و بەربەرەكانی بەرانبەر هێرشی دژمنكارانەی ڕژیمی ئاخوندی بۆ سەر كوردستان.
پێكهێنانی سازمانی خەبات زەرورەتێكی مێژوویی بوو
لە جوڵانەوەی مافخوازانەی كوردستاندا بوونی سازمانێكی سیاسی بە بیری نیشتمانی و نەتەوەیی و باگراوەندی ئیسلامی سەردەمیانەو موعتەدیل لە كاتێكدا كە لە گۆڕەپانی كوردستان دا ڕێكخراوێكی سیاسی بەو بیروباوەڕە بوونی نەبوو، هاوكاتیش خومەینی فەرمانی جیهادی دژی خەڵكی كوردستان ڕاگەیاندبوو، زەرورەت و پێویستیەكی حاشا هەڵنەگر بوو. خاڵێكی بەهێز لە دامەزرانی سازمانی خەبات ئەوە بوو لە سەر دەستی چەندین مامۆستاو كوردی تێكۆشەری دەروەست بە چارەنووسی گەلی كوردو نیشتمانەكەی و بە دوور لە ڕاسپاردەو دوور لە بیروبۆچوونی بێگانەو لە گوندەكانی كوردستان و لە گەرمەی هێرشی بەكرێگیراوانی ڕژیمی خومەینی دامەزرا. پشتیوانی جەماوەری كوردستان و جێگەی متمانەبوونی لە لای كۆمەڵانی خەڵكی كوردستان و پشتیوانی بەرەوامی جەماوەر لە ڕۆژانی سەرەتای دامەزرانی سازمان لە مەیدانی بەربەرەكانی و ڕووبەڕووبونەوە لەگەڵ دژمنانی كورد، بە تایبەتی لە بەرەنگاربوونەوەی شەڕی داسەپاوی ڕژیمی ئاخوندی، یەكێكی دیكە لە بەڵگەكانە لە سەر زەرورەتی پێكهاتنی. ئەزموونی چل و پێنج ساڵ تێكۆشان و نەبەزی و خۆڕاگری لە بەرانبەر دەیان پیلانی نەیاران و ناحەزان و پیلانە بەردەوامەكانی ڕژیمی دیكتاتۆری ئاخوندی، یەكێكی دیكە لە بەڵگە حاشاهەڵنەگرەكانە لە مەڕ زەرورەت و گرینگی سازمانی خەبات ی كوردستانی ئێران. لەم قۆناغەدا باشتر لە ڕابردوو دەركەوتوە كە سازمانی خەبات چ پێگەیەكی گرینگی لە گۆڕەپانی خەبات و بەربەرەكانی لەگەڵ ڕژیمە دیكتاتۆر و خوێنڕێژەدا دەگێڕێ و لە تێكۆشانی بەردەوام لەپێناو ئازادی ودەستەبەركردنی مافە ڕەواكانی كۆمەڵانی خەڵكی كوردستان دەوری هەیەو جێگەی شانازیە.
بیروباوەڕی نەتەوەیی و نیشتمانی و میتۆدی جیاواز لە كردەوەدا، سازمانی خەبات خاوەن فكرو خەتی سیاسی نیشتمانی و نەتەوەییەو هیچ كام لە بیروباوەرەكان و چین و توێژەكانی كۆمەڵگەی كوردستان نامۆیی لێ ناكەن، لە هەمانكاتدا لە مەیدانی كردەوەداو بە داڕشتنی ئوسوڵ و ئیستراتیژیكی موبارزە، جیاوازی لەگەڵ هێزو لایەنەكانی گۆڕەپانی كوردستاندا هەیەو خاوەن ئامانجی ڕزگاریخوازانە لە سەر بنەمای ئاشتی و پێكەوە ژیان و فرە رەهەندیە. خۆێندنەوەی سازمان سەبارەت بە ڕژیمی دەسەڵاتدار لە ئێراندا، ئەوەیە ڕژیمی دیكتاتۆری ئاخوندی هەر لە سەرەتای بە دەسەڵات گەیشتنی دژ بە ئاشتی بووەو لە وەڵامی داوا ڕەواكانی گەلی كوردو گەلانی دیکەی ئێران بە هەڕەشەو سەركوت و ئیعدامی تێكۆشەران و ئازادیخوزان تاوان و جینایەتی بێ بەزییانەی ئەنجام داوە. هەڵسەنگاندن و بەراوردو خوێندنەوەی دروستی سازمانی خەبات سەبارەت بە ڕژیمی ئێران سەرچاوەگرتووە لە سەر پێداگری دەسەڵات لە سەر سیاسەتی جەنگخوازانەی و دژایەتی گەلی كوردو گەلانی ئێران هەر بۆیە بڕیاڕی نەگۆڕو ئیستراتیژی، ڕەدی ووت وێژ لەگەڵ ئەو دەسەڵاتەو پێشڕەوایەتی دروشم و سیاسەتی ڕوخانخوازیە، دروشم و سیاسەتێك كە لە ئێستادا لایەنەكانی دیكەش گرینگی پێی دەدەن.
دەوری سازمانی خەبات لە پڕۆسەی هاوكاری و یەكگرتوویی لە جوڵانەوەی كوردستان دا;
بەخۆشحاڵیەوە سازمانی خەبات دەورێكی بەرچاوی گێڕاوەو لە شۆرشی ڕزگاریخوازی كوردستانداو بە پاراستنی سەربەخۆیی سیاسی و چالاكی و هەڵسوڕانی، لە شەڕوململانی كورد لەگەڵ كورد دووری كردوەو تا ئەو پەڕی توانای هەوڵیداوە ڕێگری بكات لە جەنگی نێوان هێزو لایەنەكانی كوردستانی ئێران. سازمانی خەبات هەوڵی كاریگەر دەدات بۆ تەبایی لە نێوان هێزو لایەنە سیاسیەكانی كوردستان و هەروەها پێوەندی و دۆستایەتی لەگەڵ هێزە شۆرشگێڕەكانی ئێرانی دۆست و خەمخۆری گەلی كورد بە دیاری كراوی سازمانی موجاهیدینی خەڵقی ئێران و شۆڕای میللی مقاومەتی ئێران. ئەو سیاسەتە ئەرێنی و بەرپرسانە بەشێكی زۆریان لەبەرژەوەندی پرسی كورد لەناوچەكەدابوون وپرس و خەباتی كوردی بۆ دەستەبەركردنی مافە ڕەواكانی گەیاندۆتە قۆناغێكی گرنگ و پڕ بەرهەمدار لە هەموو بەشەكانی كوردستان.
تێكۆشان و شۆڕشی جەماوەریی و چل وپێنج ساڵ خەبات و تێكۆشانی سازمانی خەبات و دەستێوەردانەكانی ڕژیم لە جیهان و ناوچەكەدا;
جەماوەری تێكۆشەری كورد و گەلانی ئێران لە ماوەی هاتنە سەركاری ڕژیمی ئاخوندی بەردەوام لەگەڵ ئازاری جۆربەجۆر و سەركوت و پێشێلی ماف و ئازادیە نەتەوەیی و فەردیەكان، زیندانی و شكەنجە و ئیعدامی بەردەوامی خەڵك، قەیرانی قوڵی هەژاری و داڕمانی ئابووری وڵات و لەناوبردنی سامان و سەروەتی وڵات و تێكدانی ژینگە وئاژاوەگێڕی و دەیان گرفتی كۆمەڵایەتی و چەندین كێشەی دیكە ڕووبەڕو بونەوە، بەڵام لە تێكۆشان و بەربەرەكانی دەستیان هەڵنەگرت و لەو پەیوەندیەشدا شاهیدی خەبات و ڕاپەڕین و خۆراگری بەردەوامی گەلانی ئێران بەتایبەتی و گەلی قارەمان و تێكۆشەری كورد بووین. ڕاپەڕینی بەرینی شۆڕشی ژینا یەكێك لەو ڕاپەڕینە مەزنانە بوو كە لە كوردستانەوە سەری هەڵدا و بوە شۆڕشێكی بەرین و فراوانی سەرتاسەری لە ئێرانداو پایەكانی دەسەڵاتی لەرزۆك كرد.
ئەو ڕژیمە لەدەرەوەی سنوورەكانی ئێران بە دەستێوەردانی بەردەوامی لە كاروباری وڵاتانی دراوسێ و پشتیوانی لە گروپ و تاقمی ترۆرستیەكان وبشێوی نانەوەی لە ناوچەكەدا و هەروەها هەوڵدان بۆ دروستكردنی چەكی ئەتۆمی و پیشێلكردنی قانونە نێودەوڵەتیەكان و لە ئاكامدا هێرشی ڕاستەوخۆی ئەمریكا و ئیسڕائیل و هێزەكانی هاوپەیمانی بۆ سەر ئەو گروپ و تاقمە ترۆیستیانەی سەر بە ڕژیمی ئێران لە لوبنان، یەمەن و عێراق و لەناوبردن وكەم هێزكردنیان تووش شكستێكی گەورە بوو. پاشانیش بە هەڵگیرسانی شەڕی ڕاستەوخۆ لەگەڵ ئیسڕائیل و لەناوچوونی بەشێكی بەرچاوی ناوەندە ئەتۆمیەكانی و كوژرانی فەرماندە باڵاكانی و زانا ئەتۆمیەكانی دەسەڵاتی ئاخوندە خوێنڕێژەكانی، زەربەتێكی كاریگەر بوون. جێگەی ئاماژەیە كە شەڕی ڕژیم لەگەڵ وڵاتانی ڕۆژئاواو ئەمریكاو ئیسرائیل كۆتایی پێ نەهاتوەو درێژەی دەبێ، بیگومان بەردەوامی دەسەڵاتداران لە سەر سیاسەتی شەڕانگێزانەو پێشێلكردنی قانونە جیهانیەكان و ڕاپەڕینی بەردەوامی خەڵكی ئێرانی بە دزادا دێت ودەسەڵاتی ئاخوندی بەرەو هەڵدێر و نەمان دەبات.
ئەركەكانی سازمانی خەبات لەم قۆناغەدا;
٤٥هەمین ساڵیادی دامەزراندنی سازمانی خەبات كە هاوكاتە لەگەڵ یادی شۆڕشی ژینا، پێویستە بە بایەخدان بەم دوو یادە، ڕێگەی ڕاپەرین و بەرخودانمان ڕووناكتر و پەیمانی بەردەوامی لە خەبات و تێكۆشانمان نوێ كەینە‌وەو هەوڵەكانمان لە پێناو دەستەبەركرانی مافەكانی گەلی كوردو ڕوخانی ڕژیمی ئاخوندان یەك خەین و دژی ستەم و ناعەدالەتی بوەستینەوە. كۆمەڵانی خەڵكی كوردستانی ئێران و هەروەها ئەندامان و لایەنگرانی سازمانی خەبات لەسەرەتای سەرهەڵدانی شۆڕشی ژینادا، دەورێكی گرنگ و كاریگەریان گێڕا و كوردستان بۆ جارێكی تریش كردە مەڵبەندی خۆڕاگری و تێكۆشان و مەركەزی سەرهەڵدانی شۆڕشی سەرتاسەری دژی داگیركەران و دژمنانی ئازادی. لە ساڵیادی دامەزراندنی سازمانی خەبات و هاتنی ساڵیادی شۆڕشی ژینادا، یادی شەهیدانی سازمانی خەبات و شەهیدانی شۆڕشی ژینا بەرز دەنرخێنین و پەیمانی بەردەوامی لەخەبات و تێكۆشان تا ئازادی و وەدەسهێنانی مافەڕەواكانی گەلی كوردیان لەگەڵ نوێ دەكەینەوە.
سەركردایە‌تی سازمانی خەباتی كوردستانی ئێران، جارێكی دیكە پیرۆزبایی یادی دامەزرانی سازمانی خەبات بە كەسوكاری شەهیدە سەربەرزەكان و زیندانیانی سیاسی خۆڕاگر و كۆمەڵانی خەڵكی كوردستان و پیشمەرگەو ئەندامانی دڵسۆز و وەفاداری سازمانەكەمان ڕادەگەێنێ و بەو پەڕی پیزانینەوە ڕێز لە خەباتی بەردەوامی پێشمەرگە و ئەندامە دڵسۆزەكانی سازمانی خەبات دەگرین.
دڵنیاین بە هەوڵی تێكڕایی سازمانی خەبات دەگەیەنینە دوا پلەی سەركەوتن و وەك هەمیشە سازمانەكەمان ڕۆڵی پێشەنگ و مێژووی خۆی دەگێڕێ.
دووبارە ساڵیادی دامەزراندنی سازمانی خەبات پیرۆزبێ
بڕوخێ ڕژیمی نەگریسی ئاخوندی
كومیتەی ناوەندی سازمانی خەباتی كوردستانی ئێران
۵ی خەرمانانی ۱۴۰۴ كۆچی خۆری
