یه‌ک شه‌مه‌ 

24 پووشپه‌ڕ2724
سازمانی خه‌بات ی
کوردستانی
ئێران
sazmanixebat

عــومـــەر بــەهـرامی

 عــومـــەر بــەهـرامی
ناوه‌ندی شه‌هیدانی سازمانی خه‌بات

 یــــــادی ســــەروەری گـــــەل شـــەهـــێد عــومـــەر بــەهـرامی

باسکردن و یادکردنەوەی پێشمەرگە کە گیانی خۆیان کردە قوربانی لە پێناوی گەل و نیشتیمان و  پاراستنی کەرامەتی نەتەوەکەیان ، پێویستە ناو و یادیان دایم بە زیندوویی ڕابگرین وباسیان بکەین و یادیان بکەینەوە . دیارە شەهێد نەمرە ، بەڵام بۆ ئەوەی داییم لە بەر چاومان بن و زیندووتر ڕایان بگرین و پشتاوپشت نەوەکانیشمان شانازییان پێوە بکەن و هەتا هەتایە یاد و ناویان لە دڵماندا بمێنێ ، پێویستە بە هەر شێوەیەک کە بۆمان دەگونجێ رێز لە خۆیان و بنەماڵەی بەرێزیان بگرین ، چون ئەوان بوون کە بە خوێنی خۆیان توانییان ئەم ڕۆژەمان بۆ بێننەدی ، کە ئێستا هەمووی جیهان شانازی بە قارەمانەتی پێشمەرگەوە دەکەن .

 ئەمڕۆ بۆ یاد کردنەوە لە شۆرەلاوی کورد کاکە عومەری بەهرامی دەچینە ناوچەی بانە بۆ بۆیەنی خواروو بۆ بناری گردە کەروێشکان بۆ سەر گۆڕی ئەم شەهێدە نەمرە ، لێرە لە سەر گڵکۆی کاکە عومەر چەپکە گوڵێکی سوور دادەنێین و سەری رێز و لە بەرانبەریدا دادەنەوێنین . شەهێد عومەر کوڕی مام رە‌حمان لە بنەماڵەیەکی دەست کورت و هەژاری گوندێ بارەوەران  سەر بە شاری بانەی قارەمانپەروەر چاوی بە دنیا هەڵهێنا ، دوای لە دایک بوونی کاک عومەر زۆری نەخایاند کە دایکی کۆچی دووایی کرد و بە رەحمەتی خودا چوو ، عومەری کۆرپەلە زۆر زوو لە نازی دایک بێبەش بوو ، مام رەحمان کە خێزانەکەی لە دەست چوو، لە بارەوەران ماڵی بارکرد و چونە شاری بانە ، لە بانە بۆ ئەوەی منداڵەکەشی لە دەست نەچێ مەجبوور دووبارە ژن بێنێ ، دیارە هەمو لایەکمان دەزانین باوەژن یا بە گوتەیەکیکە زردایک لە سەدا ئەگەر یەکیان باش بێت ، ئەویش  عومەری بێ شانس بەر ئەو یەکە نەکەوت . بە داخەوە کاک عومەر پشت گوێ خرا و هیچ  پێی رانەدەگەییشتن ، بە هەر داماوییەک بوو ژیانی بردە سەر و وردە وردە خۆی پێگەیاند ، شەهیدی نەمر کاک عومەر لە زۆر بارەوە وەک هاوتەمەنەکانی خۆی نەبوو، لە زۆر بارەوە هەستی بە کەم و کووری دەکرد ، لە عاتیفە و خۆشەویستی بێ بەش بو ، بە کەیفی خۆی نەیتوانی بخوێنێ ، بە هۆی نەداری بنەماڵەکەیەوە لە هەموو پێداویستییەکی ژیان بێ بەش بو ، ئەم کەم و کووریانە بووە ئەزموونی ژیان بۆی ، هەر ئەوە بو کە کۆڵی نەدا و بە تەمەنێکی کەمەوە خۆی خستە ژێر باری  زەحمەت بۆ ئەوەی بتوانی بژێوی خۆی پەیدا بکا و لە هەمانکاتدا یارمەتییەکی بنەماڵەکەشی بدا ، کاک عومەر تا پۆلی پێنجی سەرەتایی توانی بخوێنێ ، بە هۆی ئەو بی ئیمکانیەتییەی باسمان کرد نەیتوانیوە درێژە بە خوێندن بدات . ماوەی چەند سالێک بە شاگردی دوکان ، نۆک فرۆشی و کاری کاسەکێشیەوە خەریک بووە تا شۆرشی گەلانی ئیران دژی رژێمی ئیستیبدادی پەهلەوی دەستی پێ کرد و شای ئیرانیان دەربەدەر کرد . جمهووری ئیسلامی بە رێبەرایەتی خومەینی خوێنرێژ  و مێشک وشک ودار و دەستەکەی لە ئیراندا دەسەڵاتیان گرتە دەست و دوای ماوەیەکی کەم کە جێ قوونیان بە باشی گەرم نەببوو ، خومەینی دەستووری جیهادی بۆ سەر گەلی کورد دا ، ئەو گەلەی کە لە سەردەمی دەسەڵاتی شوومی رژێمی پێشووشدا قەتی خێر و خۆشی نەدیبو ، تازە خەریکبو تامی ئازادی بچێژێ کە کەوتە بەر هێرشی داگیرکەران ، هەر ئەوەش بو کە کاک عومەر و هەزارانی وەک ئەو هاتنە مەیدان و چەکیان هەڵگرت دژی رژێمی خومەینی .

سەرەتا شەهید عومەر کە چەک هەڵدەگرێ دەبێتە پێشمەرگە لای سەرهەنگ سمکۆ عەلی یار ، زۆر باش لە بیرم نییە کە چۆن و بە چ شیوەیەک پیوەندی بەوەوە کردبو ، سەرهەنگ سمکۆ ، سەرهەنگێکی  رژێمی پێشو بوو کە هێندێک چەک و چۆڵەی پەیداکردبو و چەند پێشمەرگەیەکی هەبو کە یەک لەوانە کاک عومەر بو ، ئەو کاتە ئیمە وەک دەفتەری مامۆستا شێخ عێزەدین حسینی کارمان دەکرد کە بنکەی سەرەکیمان لە کانی مامر لە بناری سوورکێو ناوچەی بانە بوو ، لەوێ لە نزیک خۆمان شوێنێکمان دابو بە سەرهەنگ سمکۆ کە لێی بمێننەوە ، دوای ماوەیەک کە شەهید عومەر زانی هەموو رفیقەکانی لە گەڵ دەفتەری مامۆستان ، ئەویش خۆی پێ رانەگیرا و  لە ئەوەڵ مانگی هاوینی  ساڵی ١٣٥٨ دا سەرهەنگی بە جێ هێشت و هاتە ناو ریزی قارەمانانی ئەو دەمی دەفتەری مامۆستاوە ، سەرهەنگ عەلی یار شەهێد عومەری زۆر خۆش دەویست و کاک عومەر خۆشی زۆر جەوانێکی دەست پاک ، رووخۆش و لە سەر خۆ بوو ، ئەو کەڵەشینکۆفە پێنج بزمارەی کە سەرهەنگ دابوویە  ، سەرەڕای ئەوەش کە بە جێشی دەهێشتن پێشکەش بە کاک عومەری کرد ، تا ئەو کاتەش کە شەهید بو ، هەر ئەو چەکەی پێ بو . کاک عومەر کە پەیوەندی کرد بە دەفتەری مامۆستاوە سەرەتا دایان بە  هێزی مەریوان کە ئەو کاتە سیرووس مەریوانی (سیرووسی رەوشەنی ) سەرپەرەستی ئەو هێزەی دەکرد ، هەر لەو سەروبەندەدا بوو کە هێزی مەریوانی حیزبی دیموکرات کۆمەڵێک چەک و تەقەمەنی کە دەفتەری مامۆستا  لەناوچەی مەریوان داینابو  لە لایەن ئەو جەماعەتەوە دەستی بە سەردا دەگیرێ ، ئەوە بوو هێزی دەفتەری مامۆستا لە ناوچەکانی ترەوە رویانکردە مەریوان بۆ وەرگرتنەوەی ئەو چەکانە ، شەهێد عومەر یەکێک بوو لەو پێشمەرگانەی کە ئەو ئەرکەیان پێ سپێردرابو ، زۆر چالاکانە ئاخرین فیشەکیان لێ ساندنەوە. 

 لە ساڵی ١٣٥٨ دا کە دەفتەری مامۆستا چەند هێزی بۆ شەر لەبەرانبەرهیزەکانی رژیم بۆ ناوچەی سنە و کامیاران نارد ، کاک عومەر وەک پێشمەرگەیەک لە گەڵ یەکێک لەو هێزەانە چووە ناوچەی کامیاران و ماوەیەک لەوێ لە جەولەی سیاسی و نیزامیان دەکرد، لە گوندەکانی خامسان، دێگولان، نەجەفاوا و گوندەکانی دەوروبەری کامیاران و بەشداری لە چەند چالاکی نیزامیدا دژ بە داگیرکەرانی کوردستان کرد لە سەر رێگای سەرەکی کامیاران بۆ سنە  . دوای ئەوەی لە ناوچەی کامیاران هاتەوە بۆ بانە ، ناردرایە پەلی خاڵە عەلی (عەلی حاجی عەتتار)  و زۆری پێ نەچوو کە شەری سێ مانگە لە رۆژهەڵاتی کوردستان دەستی پێ کرد و لە بەهاری ساڵی ١٣٥٩ دا لە سەرەتای مانگی بانەمەر ئاگری ئەو شەرە داسەپاو و مالوێرانکەرە  ناوچەی بانە و بە تاییبەت ناو شاری بانەی خۆراگریشی گرتەوە ، شەری ناو شاری بانە ٣٧ رۆژ درێژەی کێشا کە ماڵوێرانییەکی زۆری لی کەوتەوە  و خەسارەتێکی زۆر بەر شارەکە کەوت و خەڵکێکی زۆری بێتاوان شەهید و بریندار بوون . بە هۆی ئەو داپلۆسینە کووێرانەی داگیرکەران کە زۆر بێرەحمانە هیچ شوێنیکیان نەدەپاراست نە مزگەوت و نە بیمارستان ، خەڵکەکە ناچار پەنایان بردە بەر گوندەکانی دەورووبەری شارەکە و تێکرا ئەوەی کە توانی بروا چوونە ئاوایییەکان تا شەرەکە هێواش بووەوە .

 تازە چەند رۆژێک لەو  شەرە داسەپاوە گوزەرابو کە هێزی پێشمەرگە بریاری گرتنی پادگانی بانەیان دا ، لەو بەرنامە و پلانەدا ئێمە لکی خاڵە عەلی وەک هێزێکی پشتیوانی لە دەوروبەری سەوغانان لە بن تەلدرووی پادگاندا کە کرابوینە گرووپی سێ کەسی ، گرووپەکەی ئیمە لە کەریم کاک ئەبووبەکر سەحرایی و شەهێد عومەر  پێکهاتبو کە دەبو ئێمە جارجار تەقە لە سەنگەرەکانی پادگان بکەین بۆ ئەوەی بە خۆمانەوە سەرگەرمیان بکەیێن تا گرووپی هێرشبەر لە شوێنی دیاریکراوی خۆیانەوە بچنە ناو پادگان . جار جار تەقەیەکمان دەکرد تا لە کاتژمێر هەشتی شەودا شەر بە گەرمی لە هەموولایەکەوە دەستی پێ کرد ، لە پادگانەوە کوێرانە بە تۆپ و خومپارە و هەموو جۆرە چەکێک ناوشاری بوردوومان دەکرد سەرەرای ئەوە بە فرۆکەی فانتۆم بۆمبابارانی دەکردین ، بە داخێکی گرانەوە لە کاتژمێر هەشت و سی دەقیقەدا خومپارەیەکی دوژمن کەوتە ناومان و پارچەیەکی خومپارەکە بەر پشتەسەری کاک عومەر کەوتبو ، کاک عومەر برینەکەی سەخت بوو بە پەلە گەیاندمانە بیمارستان ، هەر زوو کە بەرێز مامۆستا شێخ جەڵال خەبەری بریندار بوونی کاک عومەر دەبیستێ خۆی گەیاندە بیمارستان ، بەرێز مامۆستا زۆر بە پەرۆش و نگەران بو کە عومەری جوانی دی کە زامەکەی سەختە ، دوای ماوەیەکی کەم کاک عومەر بە هۆی سەختی برینەکەییەوە لە نەخۆشخانە شەهید بوو، بەرێز مامۆستا کەمێک رێنمایی و دڵنەوایی کردین و هەر ئەو شەوە جەنازەی پیرۆزی کاک عومەرمان گواستەوە بۆ بۆیەنی خووارو ،بە زۆری شەهیدانی ئەو ماوەی شەری شاری بانەمان دەهێنایەوە بۆیەنی خووارو .

لە گۆرستانی بۆیەن لە بناری گردەکەروێشکان بە بەشداری جەماوەری گەلەکەمان شەهید عومەری جوانەمەرگمان بە خاکی پیرۆزی نیشتیمان ئەسپارد . هەزاران هەزار دروود و رەحمەتی خودا بۆ رۆحی پاک و بێگەردی کاک عومەری جوانەمەرگ و هەموو شەهیدانی سوورخەڵاتی گەلەکەمان ، سڵاو بۆ رێبوارانی رێگا پیرۆزەکەی شەهیدی نەمر کاک عومەر و سەرکەوتن بۆ گەلی قارەمانی کورد لە هەمووی کوردستان . 


3 ساڵ و 9 مانگ و 27 ڕۆژ و 1 کاتژمێر و 35 خوله‌ک له‌مه‌وپێش‌

شه‌هیدان

په‌ڕه‌ تایبه‌تیه‌کانی ماڵپه‌ڕ

په‌یوه‌ندی گرتن


ژماره‌ی ته‌له‌فۆن کوردستان : 07506206655 (00964)
ژماره‌ی ته‌له‌فۆن کوردستان : 07504687209 (00964)
ژماره‌ی ته‌له‌فۆن کوردستان : 07504497138 (00964)
ژماره‌ی ته‌له‌فۆن ئوروپا     : 0767676746   (0046)
ژماره‌ی ته‌له‌فۆن ئوروپا       : 040331264   (0047)



په‌یوه‌ندی ئه‌له‌کترۆنی:



[email protected] 
[email protected]
xebatmedia@sazmanixebat.net
[email protected]om

ئۆرگانه‌کانی سازمانی خه‌بات


ڕێکخراوی ئافره‌تانی خه‌باتی کوردستانی ئێران 

ڕێکخراوی لاوانی خه‌باتی کوردستانی ئێران